呢個新年政圈最紅係邊個？梗係做緊署理特首嘅林鄭月娥！事關喺年初一至年初四，佢除咗初三赤口冇亮相之外，日日馬不停蹄連走幾場同市民賀新歲；八方睇番佢三日現身拜年look，紅、金、粉紅日日襯到足，難怪俾市民叫佢月娥BB咁風騷。
狼英離港度歲，林鄭「名正言順」做特首，年初一以應節大紅外套，連走港九新界四場活動，包括探訪護理安老院、主持香港許願節點燈、視察深圳灣管制站同坐鎮賀歲盃開幕禮，成個利是封咁嘅佢去到邊都好受歡迎。初二晚林鄭卸下紅噹噹，換上金色旗袍，同賀歲煙花鬥閃鬥耀眼。
初三小休一日，林鄭噚日再出動，參加西貢一個迎春活動。試過紅、金，林鄭噚日轉戰平時好少着嘅鮮艷粉紅，喺區內巡遊同街坊拜年，又探訪基層市民，𠱁到唔少街坊好開心。佢當然不忘推銷政改，仲透露政府會喺初七人日，啟動全新大型宣傳活動「築福香港」。有政界中人話林鄭新年幾乎唔休息，日日出巡sell政改，如果2017年有普選，阿爺唔畀佢選特首都情何以堪？
