馮寶寶前晚喺中環大會堂舉行「昨日今日明日馮寶寶爆趣音樂會」，石修、姜大偉、李琳琳、魯芬、薛凱琪同媽咪都有嚟捧場。馮寶寶先後唱《浪子心聲》同《問我》等懷舊金曲。
童星出身嘅馮寶寶出名有嗰句講嗰句，喺台上都唔介意透露芳齡，佢話自己3歲入行，過多3年就慶祝入行60周年。之後佢仲寸爆亞視，N年前幫亞視拍過《武則天》嘅寶寶喺台上話：「前年亞視台慶請咗我去北京表演，仲唱《武則天》主題曲，嘩！咁威梗係去啦！點知冇耐又有台慶，要過深圳做。」馮寶寶擺明寸亞視嘅台慶密密做啦！
表情抄祥哥
寸完亞視，馮寶寶又將火頭辣喺周星馳身上，佢話：「我睇《他來自江湖》覺得周星馳好笑，見佢咁紅咪自己研究吓，發現佢係學新馬仔、林蛟呢啲前輩表情，祥哥因為人矮，做戲時打斜望高。」佢隨即周星馳上身，令台下笑聲不絕。
撰文：馮仁昭
