民主黨何俊仁早排裝修間屋，為咗安置幾千本寶貝書，特別整咗一個迷你圖書館，噚日趁新春佳節同傳媒拜年時開放參觀。仁哥個幾十呎「圖書館」由天到地，由左至右，大吉利是都要講，全部都係書。仁哥話裝修時同設計師提出「要裝到最多書」要求，但由於「館藏」太多，部份書籍要分流到客廳、飯廳同工人房。愛讀文學、歷史、哲學書嘅仁哥，同傳媒推介佛洛伊德嘅《The Interpretation of Dreams》一書，內容解釋到平日啲政客點解會「鬼拍後尾枕」講出真相。既然書太多，時間太少，仁哥笑笑口話隨時要等將來佔中被判坐監，入獄時先可以慢慢欣賞。