新正頭最緊要講意頭，行大運係唔少財經人嘅指定動作，無論係出埠抑或留港兜個圈，同樣可以攞個好意頭。
股評人陸叔（陳永陸）就選擇噚日遊車河兜港島行大運，經赤柱、石澳、筲箕灣，再落番中環，佢話度度都人多，自己揸車舒舒服服。
另一股評人熊麗萍就趁年初一人少行沙田新城市廣場、西貢、赤柱等，貪唔使同自由行逼咁話。
豐盛金融董事黃國英（Alex）旗下基金嚿年賺到盤滿砵滿，繼聖誕期間去咗新加坡叉電後，佢今年新年就選擇去日本大阪行個大運當獎勵自己，兼放假養精蓄銳，為馬年落場再博殺做準備。佢年初二出發，明日初六返港，初七正式返工再揸鑊鏟。
日圓近期雖然彈番多少，但仍然喺偏低水平，精打細算嘅Alex果然識揀！