聯想（992）剛在農曆新年前完成一單大deal，用226億、即超過自己五分之一市值的金額，向Google收購Motorola手機業務。呢個消息一出，市場無人敢睇好。因為條數好易計：Motorola去年一共蝕了97億港紙，經營層面上嘅loss margin大約5%；聯想截至9月底止的12個月，盈利不過得57億。海迪就當Motorola長遠真係fixable，但聯想要消化呢單收購，所需嘅時間睇怕係數以N年計。投資者唔沽貨就有鬼。
聯想的「大想頭」已經唔係第一次。2005年，公司收購IBM的PC業務，雖然生產PC係有一股夕陽行業feel，但聯想最後憑藉壓低成本、割喉減價，搶攻新興市場這幾道板斧，居然枯井都俾佢挖到水飲，最後仲成為全球No.1嘅生產商。有咗規模效益和定價能力做保護，聯想往後的日子就好過得多。
今次，同樣招數、同樣嘅故事，聯想係咪可以複製喺Motorola身上？新興市場的智能電話滲透率現時只得20%，所以市場需求唔係問題。真正的挑戰，是在於行業margin不斷收縮之下，聯想是否能夠爭取到足夠的規模，令自己變得profitable。雖然買咗Motorola，已令聯想立即躍升成為全球第三大電話生產商，市佔率逾6%，但和第一、第二嘅三星（29%）和蘋果（17%）比較，仍有幾條街的距離，分分鐘出師未捷就先被夾死。聯想今次要再創奇蹟，難度將會係十級高。
海迪