趁噚日大年初四，民主黨單仲偕一如以往請傳媒去佢屋企拜年，席間仲攞咗一支美國駐港前總領事楊甦棣送嘅紅酒同傳媒分享，傳媒即時笑佢勾結外國勢力。呢支酒係楊甦棣離任前嘅聖誕送畀佢，八方拎起支紅酒𥄫𥄫，發現原來係Henry Estate Pinot Noir 2008。Henry？一眾傳媒即時諗起唐唐，唔通楊甦棣係若有所指？嚟緊應該去海怡西參加南區區議會補選嘅單雞話，對今次選舉絕不樂觀，因為佢同人民力量嘅袁彌明都係泛民票源，而前區議員、升呢「白宮發言人」嘅馮煒光當年只係贏對手12票，相信新民黨陳家珮勝出機會較大，惟有盡做。