杜拜前日賣出一個價值近20億美元（約156億港元）嘅豪華物業，買家仲要係香港周大福！大孖沙海外投資物業無乜出奇，奇就奇在此周大福不同彼周大福（1929），即唔係由純官鄭家純揸住、賣金賣到成行成巿嗰間，而係同樣報稱來自香港，但撞名撞到應一應嘅「周大福養老產業投資」。
呢間「周大福養老」同周大福珠寶一啲關係都無，但來頭亦唔細，見佢哋億億聲咁買起杜拜豪宅就知非同小可。周大福養老係內地民政部養老基金投資嘅獨家夥伴，嚟緊仲會喺內地同全球建立唔同嘅周大福養老區。真係唔知周大福應該告佢哋個名侵權，定多謝佢哋幫手宣傳好。講番杜拜呢個物業，建築面積有成2,000萬呎，包括高級住宅、服務式公寓同埋兩間酒店，預計2017年落成。