甲午年祝讀者喺股票市場搵到隻千里馬，長升長有。頭炮就買中軟國際（354），集團集齊最強股東及夥伴，又食住祖國IT火爆期，有千里馬嘅質地，翻一番，略嫌睇扁咗佢。
中軟大股東係聯想（992）阿媽聯想集團，又啱上年尾，中軟同阿里巴巴旗下「阿里雲」合作雲端業務。中軟拍住祖國兩大巨頭，「鋼三角」陣容優勢，掃晒！
PE落後內地同業
而全球互聯網通信、網購、電貿，已經同生活不可分割，無論軟件開發，或者透過雲服務，去應付海量資料儲存，都有勁大需求。據IDC預計，到2020年，祖國民間IT市場規模，將高達6萬億銀人仔，全球涉及雲服務嘅巨量資料技術及服務，後年會達到1,850億港銀。市場有實實在在嘅需求，中軟掂過碌蔗。
專業評估，中軟今年EPS 0.155港銀，PE得14倍。又係咁意估中軟明年度EPS增長30%咁大把，到0.2元，PE得番11倍。祖國IT股，今明年度PE分別為54倍及34倍，場內金山軟件（3888）今年PE 29倍，金蝶（268）30倍，中軟大平賣！
中軟剛啱上月尾，向包括主席陳宇紅等，授出購股權，行使條件係，中軟要連續五個交易日，市值達到100億銀。即係話，中軟現價（2.31元）要升近1.4倍，到5.5元，先上到100億銀市值目標。又就算以中軟升1.4倍計數，明年PE都係27倍，未有耐追到祖國行家。
咪忘記，中軟市值得42億銀，呢個晒士，啃唔落好多嘢。所以，要搶攻IT市場，做一哥，實俾聯想湊大。中軟現價升10倍，市值不過500億銀，未有耐追到姊妹公司聯想，家陣上千億銀市值晒士。呢一點，先至啖啖肉。
錢雋
細價股專家
本欄逢周二、五刊出