我哋中國人最忌就係紅白雙沖，上周六巴塞隆拿主場對華倫西亞，既要𠱁中國球迷，賽前舞龍舞獅，又要顧及西班牙球迷，為前西班牙國家隊教練阿拉干尼斯默哀，搞到紅白相沖，唔到你唔信邪，結果就以2:3不敵華倫，魯營今季長勝金身被打破。
反勝為敗兼艾巴領紅
巴塞銳意同皇馬爭中國市場，上周六年初二西甲主場出擊鬥華倫西亞，賽前都搞吓花臣，安排舞龍舞獅，雖然條龍個樣真係怪怪地，同傳統中國舞龍唔多似，又青BB咁，不過都睇得出「地上最強」嘅心思，巴塞眾將嘅波衫更加印上馬字，以慶祝剛踏入馬年，魯營大螢幕仲打出「巴塞賀年」字樣㖭。但賀完中國新年冇耐，兩軍準備開波前，又為阿帥默哀，一時喜一時悲，同一個場地紅白相沖，想唔輸波都幾難。
賽前巴塞聯賽主場10連勝，7分鐘仲有好開始，智利前鋒阿歷斯山齊士先開紀錄；不過後防認真多問題，俾柏利祖同皮亞堤各建一功，華倫一度反超前2:1；巴塞之後靠問題12碼，由前鋒美斯射入追成2:2，美斯亦都打破聯賽入球荒，自上年9月28日再有聯賽進賬。但之後巴塞後防再走漏柏高艾卡沙，俾佢59分鐘輕鬆門前建功，華倫以3:2贏波，仲打破巴塞今季魯營主場長勝金身㖭；正所謂「黑起上嚟有條路」，巴塞左閘佐迪艾巴78分鐘兩黃一紅被逐，真係賠了夫人又折兵。
我求大俠唔係導人迷信，但巴塞呢期真係冇早幾年咁順，前會長羅素收購尼馬涉虧空公款單嘢，已經令球會惹上官非，西班牙法庭仲準備邀請尼馬爸爸出庭作供。或者巴塞就想做番啲嘢沖喜，據報球會有感34歲中場沙維年事已高，有意收購曼城中場大衛施華作接班人，不過曼城喺歐洲都算數一數二有錢，想收購佢哋中場大腦，真係難度好高囉。