張智霖（Chilam)噚日喺沙田馬場開工，紅噹噹坐住車巡遊唱《歲月如歌》，佢話馬年第一日入馬場開工，梗係要落注買馬，前晚同老婆袁詠儀、囝囝魔童睇完煙花，噚日魔童變身蜘蛛俠郊遊，聽日佢哋會去馬爾代夫旅行，Chilam話：「朋友嚇我話馬爾代夫冇啖好食，諗住帶蘿蔔糕去食。」
城城嘅愛駒「愛的呼喚」噚日出賽，佢早咗三個鐘到馬場，最後跑第三，佢話好滿意：「跑得好好，買位置都有錢收。馬年進步，要好似『愛的呼喚』，佢成長咗好多，見到佢好有heart，好似我咁！」佢話農曆年會留港陪媽咪，之後返內地拍戲，想唔想拍拖？佢話：「遇到合得來嘅一定會拍拖。」
阿蘇唔敢食雞
同場仲有陳法拉舊愛薛世恆、許晉亨同早前患H1N1（甲型流感）嘅蘇施黃，問阿蘇仲食唔食雞？佢話：「冇食雞兩個月喇。但雞係中國好好嘅食材，叫梁振英收皮啦！唔識食嘅人先會話叫人食冰鮮雞。政府可以幫助雞農養質素好嘅雞，唔係吓吓殺咗啲雞，成日斬腳趾避沙蟲。」
撰文：馮仁昭
