今日大年初四，小弟祝各位身體健康，馬年行大運！適逢大年初一轉會窗關閉，不少歐洲球會都希望最後衝刺，轉會轉人轉大運。看來以AC最鴻運當頭，先借得中堅阿爾拉米及進攻球員泰拉拔；加上免費簽入本田圭佑及艾辛，幾近「空手套白狼」地一口氣將前場活力、中場守力不足及防線缺人問題解決了。加上施多夫接掌擔當沖喜作用(執教能力未知)，相信AC仍有力在下半季爬升回較合理位置。
另外兩支意甲兵國米及祖記亦在最後一刻出手。前者以估計2,000萬歐元奪巴西進攻中場靴蘭尼斯，此子在拉素已證身價，相信加盟國米可「即插即用」；而祖記借得於修咸頓鬧事的奧斯華度，雖令前線現人滿之患，但勝在唔使錢。史雲斯教頭米高勞特立說季中轉會首要原則是找熟悉當地聯賽的球員，減少磨合時間。上述兩宗交易都非常精明。
西甲褪色勁旅華倫西亞則因莫財成大賣家，季中已放走阿爾拉米、普斯迪加及班尼加等5位主力。其實華倫「爛船都有三斤釘」，陣中仍不乏猛將。咁又燒到曼聯嗰叠：早傳曼聯對華倫的阿根廷國腳班尼加有與趣，此子於中場能攻善守，又可遠射，正是曼聯缺乏之人；而華倫左右閘馬菲奧及荷奧彭利拿亦應合用。但高價購得桑馬達後曼聯便再無動作。現班尼加竟免費借回阿根廷聯賽都冇去曼聯，唔知算唔算曼聯「走」運？