古語有云：「紅顏禍水」，估唔到連西人都深信呢一套。今季猶如衰神附體嘅AC米蘭射手艾沙拉維（左），為咗挽救一落千丈嘅足球事業，決定聽媽媽的話，忍痛結束一段姊弟戀。21歲嘅艾沙拉維，前季屢屢救主，令「要錢冇錢，要人冇人」嘅A米度過困境，不過隨巴洛迪利去季加盟，呢顆新星亦極速殞落，矛頭直指小法老身邊紅顏Ester（右）。
冇貓唔食魚，正如冇球星唔喜愛夜蒲一樣，艾沙拉維同Ester不時出入夜店狂歡，夜夜笙歌，精力耗盡去到訓練基地都冇力跑啦，狀態唔下滑至奇。雖然全怪晒女友係有啲唔公平兼冇風度，但艾拉沙維上季於意甲嘅入球，都係跟大3年嘅Ester交往前取得，小法老拍拖之後就啞火，Ester惟有認罪啦。
成功男人背後都有個女人，小法老身後嘅並非美女而係母親大人，呢個故事亦可能係教訓女伴最緊要討好人哋個母親大人！
文：呂晨
以女性角度看球星新聞，唔用眉筆用原子筆寫低球壇百態！