以下內容，為某間電視台之秘密會議……
監製問：「呀寫稿，今年樓上話會喺馬年搞個體育特備節目，有乜嘢玩先？」
「呀監製，有有有！新年流流個個食到肚滿腸肥，不如搵啲運動做吓先？馬年吖嘛，梗係要應吓節啦，先搵個太極師傅教紮馬，然後搵呀體操王子阮馬素教大家點樣玩鞍馬，再搵個營養師提吓大家點樣應付半馬同全馬；幾位姓馬嘅主持人就好特別咁出場，一個個騎住膊馬，哈哈哈！」
「好好笑咩？你究竟係咪香港人嚟㗎？放假攤喺屋企，仲同你郁嚟郁去做運動咁辛苦？睬你都儍啦，再諗過呀！」
「呀監製，得得得！咁不如搞個懶特別嘅睇波節目嘞，頭頭尾尾都加個馬字上去，開波前介紹陣容呢就叫做『晒馬』；直播睇波就大叫去馬；搵埋紮馬尾嗰個師傅分析吓馬年邊位球員有運行，旺桑馬達定旺尼馬；再搵啲元老級前輩出嚟講吓歷史，睇吓以往嘅馬年點樣帶旺啲個名有個馬字嘅『馬家軍』咁囉，哈哈哈！」
「好好笑咩？你究竟係咪運動人嚟㗎？我係咁意search吓個記憶資料庫，都知道馬年係剋住姓馬嘅人㗎啦！嗱，2002年日韓世界盃，馬甸尼即係我偶像呀，諗住對南韓有運行啦，殊不知佢就係頂唔贏安貞煥，一世英名一朝喪囉！1990年又係馬年啦，馬勒當拿單天保至尊入世盃決賽啦，最後全場邊個喊得最淒慘吖？咪又係佢囉。咁馬年又點算旺班老馬呢？」
「呀監製，係係係！咁我惟有出撒手鐧，爆大鑊嘞！香港人最鍾意八卦嘢，我哋一於搵班唔露面嘅行內人，喺比賽期間同觀眾玩互動電話遊戲，叫做『馬上phone』，畀大家估吓場波邊個球員打得最差、『露出馬腳』；到賽後馬後炮時段呢，再嚟一個踢爆環節，解構場波嘅造馬程度，大快人心，觀眾實like，哈哈哈！」
「唉，勉強當你呢條橋得啦，不過都係普通啲。」
「呀監製，邊一年嘅賀年節目唔係一模一樣、普普通通㗎！」
KEYMAN
now TV主持