左丁山兒童時代，記得農曆年期間，所有酒家茶樓會放假休息，絕大部份舖頭亦都閉門停業三幾日至一個星期。有一年先父叫左丁山落街買麵包及「香港時報」，左丁山由洗衣街行到廣東道，轉左行到去佐敦道，再轉左行去彌敦道，再由彌敦道南行至麗聲戲院，先至買齊麵包及香港時報。現今世界唔同咯，新春期間，市面如常，休息停業嘅舖頭只佔少數，畢竟依家租金高昂，遊客帶來生意不絕，邊度有老闆肯在黃金檔期休息停業㗎。
過年前，左丁山偷得浮生半日閒，在一個下午行到廣東道觀察吓，果然內地遊客人頭湧湧，幾乎個個一大件，一小件，海港城內嘅City'super不知幾好生意，操普通話嘅女士連菜都買埋，唔通蔬菜都要帶回內地？海港城內生意好成咁，九龍倉集團嘅大股東一定笑逐顏開。想當年，包玉剛真係天才，好似有水晶球咁，身為兩大船王之一，竟然及早醒覺，雖不棄船，人要登岸，在1979至1980年間，發動一場敵意收購戰，得匯豐銀行及獲多利之助，從怡和集團手上搶去九龍倉嘅控制權，因此而收埋會德豐、連卡佛、香港電車。當初好多人話二十二億元收購九倉控制權好貴好貴，哦，依家知道嘞，前人種果後人收，試睇吓今日之銅鑼灣時代廣場、廣東道海港城，究竟值幾多錢？二十二億元只夠買幾個山頂豪宅！相形之下，與包玉剛爭奪船王寶座之董浩雲唔識上岸之奧妙，繼續大力投資航運，擴充船隊，卒之八十年代初期遇上船運不景氣，海上帝國破產，全靠兒子董建華有人緣，得各大銀行幫忙重組債務，又有霍英東出手幫忙，先至渡過難關。做大生意，主席級人馬最緊要有前瞻性眼光，有戰略性思維，為集團生意部署發展大方向。日日掛住督促下屬做好日常工作嘅董事局主席，只係二級人物。包玉剛經營航運，是否叻過董浩雲，好難講，但佢及早上岸搶灘，佔據廣東道，的確係造福繼承人起碼一百年之商業偉舉，非董浩雲所能及。但至今仍有一個謎，當年匯豐肯大力支持包玉剛爭奪蘇格蘭同鄉之企業，原因為何，左丁山至今木宰羊。