雷神斷纜！全聯盟最火熱嘅得分好手杜蘭特（KD），估唔到會喺上周五大勝網隊120:95嘅比賽，斷咗連續12場射入30分或以上嘅紀錄。不過KD賽後話，最重要係球隊連勝，事關贏埋呢場波，雷霆已經連贏10場，喺西岸放甩馬刺同拓荒者4場咁多！
打3節已K.O.網隊
保持唔到紀錄，並唔係因為KD打得唔好，反而係佢打得太好，頭3節打咗30分鐘，已經以超過83%嘅命中率，射入26分之多，而雷霆亦拋離成30分；話晒球隊翌日要作客巫師，教練史葛布克斯當然希望收埋主力，所以第3節剩番分幾鐘，就畀KD落場休息。
布克斯賽後都話，有問過KD仲想唔想落場，入多兩球等紀錄可以保持落去，跟住仲笑笑口話：「佢完住唔在乎，所以今次斷纜，唔好怪我呀！」雖然得分紀錄斷咗，但KD已成為繼1987年嘅米高佐敦之後，單月錄得至少550分同90個助攻嘅星級球員。
講真，雷霆𠵱家喺聯盟領先，KD亦以平均31.2分，好大機會成為得分王，以呢個走勢，常規賽MVP十拿九穩；難得KD唔將個人榮譽當係咩一回事，俾記者問到會唔會覺得（斷纜）可惜，就話最緊要係球隊連勝唔好斷纜就得。打法實際，而且年年進步，今年先25歲嘅KD話想打到40歲，未必係天方夜譚喎！