林海峰和葛民輝合體演出的「軟硬嘻哈Opera2014」，前晚大年初一在紅館演出尾場，兩人扮BIGBANG唱賀年歌，令人笑破肚皮。往年在農曆新年這個黃金檔期開騷，歌手幾乎𢭃利是𢭃到手軟，軟硬今次也破了紅館紀錄──全晚只𢭃得四封合共80大元的利是，為過年紅館開騷創下最低紀錄！
林海峰（Jan）和葛民輝前晚在紅館舉行尾場演唱會，林海峰太太彭羚、蘇永康與女友、薛凱琪等均有捧場。前日適逢是年初一兼尾場，過往不少歌手在農曆年開騷均𢭃利是𢭃到手軟，事前張揚會在紅館強搶利是的軟硬，前晚化身「高山青龍」，聲稱要向世界級發展，準備book紅館開騷，所以有一個籌款活動，要落台收利是，穿上背心牛仔褲的阿葛笑說：「年初一啲人好鍾意畀利是，咪試吓落台籌款。」
觀眾搞笑送西芹
未知是否因三面舞台與觀眾席有距離，加上觀眾以年輕一輩為主，欠缺師奶觀眾，故此派利是情況並不踴躍，最後軟硬各自向觀眾𢭃了兩封利是，他們搞鬼公開拆利是，原來每封20元，即軟硬合共𢭃了80大元，阿Jan忍不住說：「吓！廿蚊封，𠵱家得80蚊，點包場呀？羽毛球場都book唔到啦！」𢭃利是不得要領，軟硬在「新光白虎」環節中，獲台下觀眾獻花，但那束不是靚靚鮮花，而是一紮西芹花，認真失威！難怪阿葛忍不住笑說：「西芹加韭菜，你𠵱家拜神呀？當我哋土地呀。」幸好後來他們模仿BIGBANG成員G-DRAGON和太陽，大唱用中國賀年歌歌詞改編而成的《Fantastic Baby》，見阿Jan一頭藍色長假髮，邊chok邊跳邊唱夾雜韓文的歌詞，令全場爆笑。他們又惡搞「罪與佛」，令fans笑破肚皮，總算挽回不少聲勢。
完騷後軟硬在後台受訪，被笑問是否堅收利是？他們笑說：「係呀！我諗我哋軟硬係破咗紅館紀錄，𢭃咗80蚊利是，唔係最少，係恰到好處，好意頭收咗80蚊，我哋會用呢80蚊book場。」
玩殯儀館冇禁忌
問軟硬會否計劃巡迴？兩人狀甚認真說：「我哋會巡迴紅磡殯儀館！因為要去全世界，所以去世界tour，之後諗其他形式去做，可能係推出新光白虎，高山青龍，軟硬可以暫時休養。」新年流流講呢啲，認真大吉利是！不過，年前阿葛扮高山青龍開騷，曾因心臟不適暈倒，問他會否有陰影？阿Jan代答：「件事過咗喇，軟硬可以唞吓！」
問到兩人在台上穿高中女生校服表演時，阿葛笑稱要將安全感給男人，給安全套反而冇用，令阿Jan口窒窒。阿葛事後代阿Jan解釋：「效果嚟㗎！做場數越多，諗嘅新嘢會多咗，因為熟咗rundown，開始曳喇！」阿Jan亦說：「唔加新嘢以為播帶，點都要搵番啲破綻！」但當重提阿Jan在台上當住囡囡面前睇色情雜誌，阿Jan說：「我帶佢返火星住先，呢啲嘢避唔到，書呢個物體，好似係石器時代嘅嘢，用嚟懷舊。」
採訪：王連連
攝影：黃偉雄
