踏入耳順之年，身體健康又有孫可弄，綽號「大師姐」、已退休的香港第一代女IT人姚麥麗敏5年來卻選另一條路——創業，還大膽以自己大號作品牌。5年下來，大師姐年糕不至於譽滿香江但也算闖出名堂，由「IT高人」變身「IT糕人」，她說，一切只因恩師江獻珠的一句說話而起。
記者：何凱兒
姚麥麗敏是江獻珠在香港的首徒，「2009年9月，老師叫我做番啲嘢，咁寫食譜我又唔夠老師多，教人煮嘢食又太困身，搞私房菜老公又話唔識計成本會蝕死，於是我諗不如做個brand，run in咗之後我唔使日日入廚房，嗰時最近嘅時節係農曆新年，咁不如做糕，搞得嚟就10月，之後1月就面世。」
有10個合作夥伴
雖然姚麥麗敏精於烹飪，但她不精計數做生意。「第一年搵咗Citysuper個買手，佢試食完之後當席話畀兩間舖寄賣（IFC及廣東道），賣幾多錢？唔知，我話咁蘿蔔糕148蚊喇，但佢話可以賣160-170蚊，於是，賣168蚊。」
除了價錢，連應該出多少製品也毫無頭緒。「Citysuper嘅意見係，你預咗幾十個一日喇，咁我就諗不如做6,000底，於是就去買材料」，除Citysuper，第一年還在大班樓、五樓廚房寄賣，她說可能因師傅在專欄提過，加上飲食雜誌那篇《一個名牌的誕生》，第一年就賣出1萬底糕，因來不及備料，最終也只能追加至1萬底。
發展至今，大師姐品牌有近30款產品、10個合作夥伴，5年來姚麥麗敏不斷為新舊產品更換或引入最好的合作夥伴。「睇佢邊方面強就搵佢做邊樣，有啲供應商係要我自己先搵到，我係好嚴謹嘅，我好憎人耍我，淨係做糕我都有3個partner」。她說，最初很多合作夥伴也「睇少」她，更「唔會聽佢枝笛」，例如第二個替她做糕的，就完全違背她的降溫規定。「我好難揀business partner，呢個違背咗好多公司嘅原則，我好慶幸我啲股東對我好支持！」
暫專注香港市場
選料上乘，更是違背本少利大的營商法則，但有麝自然香，上門求合作的大有人在，「呢盤生意冇大賺，但一定要有良心畀最靚嘅嘢人食，好似嚿年新出嘅奶皇月餅，好好賣，但利錢唔夠10%。」
今年，「大師姐」的糕售出數萬底，姚麥麗敏說約佔香港整個年糕市場3%市佔率。
「我仍係創業初期，仲未ready，而家專心搞好香港，有人傾過想打入北美，大陸未有，台灣呢，原來家有白事先會出現蘿蔔糕，所以薑汁黑糖年糕同椰汁年糕會易啲入到去。」
廚房媲美小型餐廳
【設備齊全】
工欲善其事必先利其器，看一個廚師的廚房，便可知廚師的功力。姚麥麗敏的廚房，「架生」齊備得能媲美小型餐廳，那個現時買少見少的中式爐頭，彷佛就是整個廚房的靈魂。
中式爐頭度身訂做
大師姐說，5年前搬到現居，那個用了多年的中式爐頭，自然也跟在身邊「個高度係度身訂造，炒餸唔使抬高隻手，放到個大湯煲……」5年以來，這個廚房孕育出不少大師姐產品，當中最窩心的，相信是蔗汁百寶糕，「係為咗慶祝同老公（大師公）結婚40周年而整嘅，只係整咗一年。」
不過，高手的廚房也不是天天珍饌百味。「平時得我同大師公（其丈夫）兩個人，都係魚配菜，一係蒸魚炒菜，一係就煎魚淥油菜」。大師姐的獨生女兒嫁了去新加坡，暫時為止，為她帶來一個男外孫，在農曆年這個黃金檔期，女兒和女婿除了帶外孫回港見婆婆，也回來替她分擔一下工作，「要湊孫同睇住啲生意，我呢排都謝絕宴客，亦唔會自己蒸糕」。
入中大學藝 食家江獻珠首徒
【綽號由來】
著名食家江獻珠（廣州著名食家江太史孫女、烹飪名家）在香港僅承認3個學生，上世紀七十年代末開始拜師的姚麥麗敏是首徒，「師傅真正畀名嘅只得三個，大師姐就係我，排第二嘅係鍾師妹，因為佢姓鍾，排第三係小師妹，係中大岑嘉評教授嘅太太，不過佢就只係得師傅口授。」大師姐說，那時一班女生柴娃娃入中文大學學藝（江獻珠丈夫為中大教授），後來得她一個堅持到底。
第一代香港IT人
不過，姚麥麗敏的「大師姐」綽號，其實也適用於香港IT界。她在上世紀60年代入行，首份工在會德豐做電腦程式員兼操作員，第一部操作的電腦是NCR，入職第二年便被派往英國受訓，是不折不扣第一代香港IT人。
52歲那年，她離開Global Source退休了一年，然後又有英國公司禮聘她搞e-commerce，輾轉到2007年，獨女出嫁，她才下定決心真正退休，時為58歲，兩年後60歲正式創業，以「大師姐」作品牌推出年糕，發展至今日，已有近30款產品。
揀食材刁鑽 椰汁價錢貴三成
【製糕嚴格】
大師姐的產品並不便宜，懂得吃的說物有所值，不嗜吃的會望而卻步。姚麥麗敏說，自少愛吃是受父親啟發，味蕾早已打開，所以，每一件產品的選料，也格外刁鑽，椰汁糕和薑汁黑糖年糕的椰汁，用的是較一般新鮮椰汁貴三成的馬來西亞Mawa牌椰汁，炸合桃和腰果用合興花生油，紫薑的薑選每年6月當造後兩星期的薑等等，「我好希望有多啲識食又有興趣嘅人出嚟搞，好似蘇太、May姐，大家未必係用錢行頭！」她說，很高興近年多了人研究無添加食物，大家都希望吃得放心，而她自己，會繼續本着「做畀屋企人食」的心去經營大師姐品牌。
