黃日華與梁潔華的獨生女黃芷晴，加入港視兩年曝光率不絕，但一直只是紙上明星，所以港視7月1日開台，芷晴深感興奮：「朋友話淨係喺報紙見到我，所以今年開台好開心！」提到媽咪早前患重病入院，幸已出院回家休息，問到新年最大願望是否望媽咪身體健康？芷晴說：「當然啦！希望屋企人身體健康，朋友平平安安。佢（媽咪）出咗院，好開心可以喺屋企一齊過年。」最近被發現蜜運的芷晴，承認男友已見家長，雙親對男友都算滿意，但問到可有打算結婚？她即耍手擰頭說：「冇啦！自己出道都唔夠兩年。」
至於同樣是星二代的秦沛兒子姜文杰，笑指近日將所有金錢都投放在妹妹姜麗文的唱片上，令他沒錢出歌，他更扮喊說：「我好慘！我想喊！我冇嘢做呀！大家知自資歌手好難做，啲錢我放晒喺阿妹度，佢音樂成績非常好，但我啲歌就冇錢做，所以要拍戲先！𠵱家有得開台，我有得拍劇咪有得賺錢做音樂！唔畀我做音樂嘅話，我會死㗎！」