今日係甲午年初二，按例係開年之日，吉時就係早上三時至七時，七至下午一時係中，不過不失，一至三點（未時）屬凶，開年拜神者，宜注意及之。
年初二係沙田車公正誕，例有鄉議局代表劉皇發到車公廟為香港求籤，去年佢求到之第29號中籤：「何為邪鬼何為神，神鬼如何兩不分，但管信邪修正外，何愁天地不知聞。」大家睇吓過往一年嘅政治局面，果真正邪難定分界，神鬼不分，車公準到離奇。今日劉皇發（假如又係佢負責求籤嘅話）求到乜籤，全城注目，相信連梁振英都驚驚地，發哥今日請勿手震震呀。既然劉皇發有意思組織政黨，「打虎不離親兄弟，坐轎好過抬轎」咁話，佢求籤時一心二用，不足為奇，佢求到嘅籤文，可能有指導性。
年初三俗稱赤口，先至係市民大眾一窩蜂到車公參拜求籤之日，每年約有十萬人，現在自由行遊客隨時到港參拜車公，車公廟外打蛇餅必矣，其中一定冇左丁山份，因為生性怕人逼人，兼且年初三係賽馬日，梗係去馬場先啦。
一早有老友問及初二、初三之外嘅拜車公日期，只好翻查通勝：年初四係四絕日，諸事不宜，年初五係立春日，宜祭祀出行，拜車公幾好。吉時係早上九至一點，年初六亦好，吉時係九點至三點，年初七係破日，避之則吉，拆屋除外；其他日子係年初八，七點到三點。
拜車公，是否可以真係帶來心靈安慰，見仁見智啫，信車公靈氣，或會俾人鬧係迷信，呢啲嘢無謂辯論，總之各有所求、各取所需便是。左丁山年年去拜車公，近五年來見到一個現象，就係老年人有增無減，不少係集體坐旅遊巴到臨，似係「蛇齋餅糉」一類，有專人組織嘅。另外年輕人拜車公，竟然亦係有增無減，就不知是何原因，大概係時麾一部份，古老當時興，80後的所謂尋根運動，追尋香港本土文化是也。在車公靈籤可以在iPhone下載，連買籤都慳番嘅時候，青少年趁新年去車公求籤，可算追上潮流，起碼可以明白點解報紙大講特講何謂邪鬼何為神，考通識如有呢一條，寫答案都會充實啲。