泛民今年嘅年宵攤檔成績應該唔錯，噚日中午仲未到劈價階段，唔少產品一早售罄。公民黨寓意特首「跑馬仔」嘅玩具小馬最勁，開檔頭兩、三日，三款顏色共300隻馬仔已經清倉。
路姆西變佈景板
代表余若薇嘅白馬銷情最好，唔怪得北京唔肯畀余大狀入閘。擅寫書法嘅余大狀噚日繼續為市民寫揮春，仲向年輕人教路，捉住支筆教小朋友吊筆寫揮春，原來小朋友嘅父母都係公民黨嘅粉絲。
民主黨嘅「廁紙一狼」今年就最有創意喇，其中用嚟刷大便、印有689衰樣嘅廁紙，2,000卷賣到一卷不留，好多人買嚟藉抹走狼英洩憤。所以話年宵唔想蝕錢，最好都係賣自家品牌。
社民連嘅巨型路姆西公仔則成為少男少女嘅留影景點。工黨有李卓人坐鎮寫揮春，阿人話喎，今年最多同學仔叫佢寫「爆三過四」，用嚟代替學業進步。