【銅鑼灣】新年新氣象，中國人農曆年都習慣買新衫、新褲過年，雖然名模周汶錡（Kathy）嫁咗位法國老公Julien Lepeu，但係佢都依足中國人習俗，前日去咗銅鑼灣掃新內衣褲過年。大概下晝3點素顏戴住墨鏡嘅Kathy同歐陽妙芝先喺利園一帶行街，佢哋入咗一間內衣店行咗唔夠15分鐘就出嚟，呢間似乎唔係好啱佢哋心水。
之後Kathy同歐陽妙芝過咗去名店坊間Calvin Klein睇內衣，似乎呢隻品牌比較合Kathy嘅心水，見佢哋好用心分頭搵心水內衣，短短10分鐘Kathy已經揀咗兩款全罩杯嘅棗紅色同黑色胸圍，仲好有心得同歐陽妙芝分享點樣揀。
換貨買多啲
當周汶錡行過男裝部時，佢俾一條紅色嘅男裝內褲吸引，二話不說就指住條內褲叫身後嘅售貨員幫佢包起，睇嚟Julien都要入鄉隨俗，今日大年初一着番條紅底旺一旺佢。兩位女士買到不亦樂乎，前後行咗差唔多一個鐘至肯埋單，出到門口就急急腳分道揚鑣離開。
到噚日下晝1點鐘，又見到Kathy現身銅鑼灣呢間Calvin Klein店，原來佢攞住幾款胸圍返嚟換，順便再買多幾款包括肉色同黑色嘅胸圍，唔知有冇買番個紅bra襯番老公條紅底呢？
採訪、攝影：陳辰、楊浩賢、吳耀輝
