政圈盛傳新民黨同公民力量「談婚論嫁」，無非係為新民黨部署，2016年喺立法會新東出戰，最近仲熱傳，新民黨副主席田北辰會由新西轉戰新東㖭。咁啱得咁蹺喎，一項由沙田區議會贊助、喺年初一舉行嘅「馬年大年初一利是跑」，竟然跨區搵嚟田二少主禮；二少當日鳴炮之餘，仲會同跑手一齊起步，認真委以重任；而沙田區議會主席，又咁啱係公民力量何厚祥囉！有啲嘢，空穴來風、未必無因喎。
雖然被傳有機會轉區，但二少繼續喺新西出沒，早前佢就巡迴新西各區搞「田叔叔賀年創意掛飾工作坊」，親自落場教大家自製過年飾品，仲未棄守新西地盤㗎。