【咖喱篇】今周傾乜：英超4哥睇好邊隊？
利物浦上場威到盡，大炒同市宿敵愛華頓4粒，繼續坐穩第4位。今季個勢咁好，唔通紅軍有機入前4，踢歐聯？唔好咁老定住，小心曼聯殺上嚟！
曼聯𠵱家差利物浦6分，都係兩場波嘅差距啫，紅魔有機會追得番。紅魔本身前場好手眾多，就算莫耶斯只靠兩翼傳中嘅落後戰術，靠朗尼同尹佩斯嘅個人能力，都足以贏唔少醜陋嘅勝仗，就好似季初贏水晶宮2:0嗰類。
不過，衰就衰在佢兩位喺上半季成日受傷，搞到曼聯冇人負責埋門一腳，更令到對方唔驚曼聯嘅鋒線，夠膽壓前攻曼聯。𠵱家朗尼同尹佩斯已經出返嚟，佢兩位健健康康的話，絕對有力幫曼聯搶分！
睇咗一場桑馬達，覺得佢幾啱曼聯，一嚟已經適應咗英超，即插即用，二嚟佢雖然係攻中，但喺曼聯雙翼齊飛嘅體系入面，都做到貢獻。以莫耶斯嘅能力，小弟唔會寄望佢喺今季內可以轉變踢法，以桑馬達為核心踢中路進攻；但小弟有啲信心，佢可以利用桑馬達去改進佢雙翼齊飛嘅戰術。桑馬達長傳準，喺中路分邊同埋轉方向嘅能力唔錯，可以用傳球幫翼鋒搵空位。如果莫耶斯用得好，路爾斯華倫西亞同艾舒利楊格嘅威脅會更加大。
不得不提一點，下半季發力係莫耶斯嘅傳統，過去幾季，佢以前帶嘅愛華頓都係漸入佳境，越近季尾越踢得好。文：咖喱