【牛腩篇】今周傾乜：英超4哥睇好邊隊？
英超已踏入次循環，容許小弟大膽啲講，曼城同車路士雙藍爭標局面都好明顯，阿仙奴始終兵力有限，踏入2、3月會被歐聯同英足盃夾擊，自自然然跌番落嚟，如唔再面對嚴重傷兵問題，相信都可以拎番個季軍。最後參戰歐聯席位，暫時牌面最好係利物浦，不過小弟睇好熱刺可搞亂檔。
其實熱刺本身班底一啲都唔弱，如果賣走加里夫巴利拎番成億，好好哋咁簽2、3個頂級球員，都足夠挑戰曼城同車仔，可惜球會買人冇眼光，波亞斯排陣又衰硬頸，俾人炒真係自己攞嚟，好彩熱刺都算及時醒覺，搵到務實型嘅舒活頂上。
舒活由球員生涯一直都係實而不華嘅防中，接手熱刺打番4-4-2呢個傳統英格蘭陣式，打破晒呢幾年4-2-3-1、4-3-3嘅大潮流，套用鄧伯伯名句：「不管黑貓白貓，捉到老鼠就係好貓」，舒活接手後英超累積6場不敗，周中俾曼城大炒亦都無話可說。舒活亦都唔使背負「用貴價新兵」包袱，啱球隊踢法就有得出場，艾迪巴約即獲解凍，舒活本身由青年軍教練做起，基爾獲加、丹尼路斯等青訓兵自然更落力。唯一擔心係舒活對歐霸盃嘅取態，始終已打入32強，舒活如果貪心想全力出擊，就唔及一條心打本土賽嘅利物浦咁輕鬆。
out啲講句，「要贏人先要贏自己」，如果利物浦仲保持對維拉嘅防守意識，真係俾熱刺、愛華頓、曼聯過晒，都唔抵可憐。文：牽牛