黃耀明前年在演唱會上勇敢出櫃，令港人重新審視對同性戀的態度，具有劃時代意義。日前明哥獲邀擔任《亂噏24》嘉賓，在黎智英（肥佬黎）、蔡瀾和陳淑莊（Tanya）面前毫不保留地暢談同性戀，他希望以藝人身份站出來，令更多人關心同志權益，畢竟「革命尚未成功」。節目足本版逢周四晚上11時播出，讀者可在http://bit.ly/appletalk24重溫。
撰文：馮國康、Sidekick
黎智英與黃耀明看似風馬牛不相及，原來兩人三年前已在飯局相識。當日見面兩人噓寒問暖一番，溫馨之情刻在臉上。《亂噏24》開播以來從不設底線，難得今次邀得明哥上來，幾位主持自然會問他關於同性戀的話題。
蔡瀾自問是鹹濕佬一名，沒機會出櫃，亦缺乏同性戀常識，於是他膽粗粗問明哥：「究竟你係扮男定係扮女呢？」肥佬黎維護明哥，反應很大的說：「喂呢啲白癡問題，呢啲唔好問，亦唔應該答。」不過明哥勇者無懼，他坦蕩蕩的說：「我覺得唔係所有人都要分男同女，既然兩個都係男仔，咁都係男仔嚟嘅，當然，詳細我唔答你啦！即係你話邊個係『1』邊個係『0』嘛，但係男女都成日玩唔同嘅嘢啦。即係如果你話性，其實有好多玩法。」
肥佬黎將話題一轉，問明哥出櫃一刻可有感動，明哥說：「其實係當日下晝先決定，唔係表演嘅一部份。」當日演唱會主題是港人身份，明哥覺得需要坦白面對：「我都應該以身作則，同埋覺得乜嘢時代啫，做乜仲要避忌？所以決定講清楚。」
遭炒魷缺乏保障
Tanya認為明哥勇敢出櫃，對社會影響極大，她說：「你見多咗男仔女仔夠膽喺中環、銅鑼灣、金鐘地方拖手，畀佢哋嘅空間大咗。」蔡瀾指同性戀在很多國家仍不被接納：「印度為咗呢件嘢（同性戀）打人，俄國亦好恐怖，你應該幫到佢哋。」明哥坦言當日出櫃的確有一份使命感，他自問比很多人幸福，若他不站出來，其他人更不夠膽說，他說：「如果佢哋俾人知道有男朋友，可能工作不保，或者俾同事揶揄。」明哥組織大愛同盟，就是要爭取反歧視法，可惜至今施政報告、諮詢、立法一隻字也沒提過，明哥鄭重的對肥佬黎說：「如果因為我哋嘅性傾向俾人炒魷魚，社會係冇保障。所以我覺得革命尚未成功。」Tanya反應夠快說：「係咪同志都仍需努力！」
席間，眾人提到同性婚姻合法化，蔡瀾對婚姻制度自有一套理論：「婚姻係一啲好野蠻嘅制度，係性無能嘅男人諗出嚟！」言下之意是男人性無能，沒資格拈花惹草，便維繫到婚姻。肥佬黎笑說：「大佬我keep到婚姻，都唔會滾㗎，我都介乎性無能之間㗎！」Tanya笑說：「喂，呢個好難搭嘴！」
俊俏外表誘蔡瀾
坊間對性別認同障礙存有很多誤解，譬如肥佬黎以為男同志會有易服癖。Tanya自從做了彩虹大使，才知很多人誤以為雙性戀等同濫交。不過肥佬黎不相信雙性戀的存在：「你emotionally可以相信，但sexually唔可以。」他認識一位已婚男子，突然愛上另一男人，但過一排又分手。肥佬黎說：「佢同我講話emotionally係基佬，但實際physically唔係，之不過當時情緒太overwhelming、太strong先至會有感覺。」
蔡瀾憶起當年在紐約構思拍《玉蒲團》，亦有打算找明哥出演男主角，全因當年看過明哥的《石頭記》，被他的俊俏外表所吸引，可惜後來電影拍不成。明哥笑說：「結果去到好多年之後先拍3D！」蔡瀾反應甚大：「呢啲拍到污糟邋遢。我嗰個幾好㗎，文學嚟㗎，結果我寫成一本小說。」蔡瀾又憶述當年為拍戲，在巴塞隆拿住了一年，見證了「直」和「攣」的男人對性的開放程度差天共地。他指出直的男人，因為怕失敗沒面子，每次出擊都步步為營，大大降低成功率。反之攣男的表白方式直接得令蔡瀾佩服，他說：「我真係甘拜下風，一握手就同你勾吓（勾手指），點解我哋男女關係唔可以學佢哋呢？」明哥認為同志文化開拓了一套處理關係的方式：「可能有啲人話乜佢哋咁開放㗎？但佢哋某啲開咗嘅領域，其實係進步嚟。」
上街係優良傳統
明哥將於3月舉行的紅館個人演唱會命名為「太平山下」，顧名思義，主題離不開民生問題，也是從他1962年出生當日說起，以他的成長故事細說香港這50多年的轉變。同時，明哥亦有感近年香港轉變極大，是時候以文化紀錄者身份站出來發聲，他說：「究竟乜嘢叫『太平』呢？係咪少一句就叫太平？我覺得唔係，反而係出更多聲音，當然出聲同時，都要聽人哋講嘢。」
明哥認為今日香港已不再只追求經濟發展，而是追求更高層次的東西，譬如表達的自由、言論的自由，可惜大家的訴求似乎無處宣洩。他說：「好多事情發生現場都喺太平山下，喺維園到金鐘嗰段。我唔係鼓勵大家乜嘢都要上街，但上街係香港一個優良傳統。」
談到創作之路，肥佬黎認為時下年輕人對「創作」有極大誤解，就是以為凡創作都是完全靠想像，卻沒有考慮到現實層面，他說：「譬如我哋做市場嘅創作，如果唔係從現實去創作，你永遠都係錯。但我睇到好多𡃁仔蹺起對腳，完全對世界、對個社會唔認識就走去做創作，完全離晒題。」蔡瀾則認為如何創作都好，但都應有底線，就是不能將黑說成白，顛倒是非，他說：「唔好講話藝術家，農夫又好乜嘢人都好，呢啲人我哋一睇就會話行開啦！」Tanya笑說：「呢種叫做『語言偽術』，不過字唔係咁寫啫！」明寸梁特首。
香港人要有公民責任 明哥教訓你要記緊！
http://bit.ly/talk243001
明哥回味出櫃 蔡瀾問呢啲︰咁你係男定係女？
http://bit.ly/talk243002
反歧視撐同志 孿好直好一齊支持
http://bit.ly/talk243003
同性戀雙性戀好難分 明哥豁出去大談性取向
http://bit.ly/talk243004
明哥做玉蒲團男主角？蔡瀾幾時會開拍？
http://bit.ly/talk243005
髮型師一定係基佬？扮嚟媾女啫！
http://bit.ly/talk243006
唔出聲唔係叫做太平 香港人應該追求更多自由
http://bit.ly/talk243007
錯都講成啱冇底線 語言偽術好無恥
http://bit.ly/talk243008
師傅明白了？師徒制教曉徒弟做人態度
http://bit.ly/talk243009
冇料扮四條 越唔識o野越要寸
http://bit.ly/talk243010