公民忙於準備賀歲盃，其他甲組隊亦好唔得閒，好似喺新加坡備戰周日亞冠附嘅南華，足主羅傑承（黃衫）噚日飛到當地，同一班球員食團年飯。至於傑志完成廣州集訓後，前日終於放假，佢哋仲推出「傑出開始，志在必得」嘅賀年e-card送畀球迷㖭。
特別版波衫賣$480
話晒都係東道主，公民今次同昆卡組成聯隊出戰賀歲盃，將會有件特別版戰衣（圖），今日喺大球場公開發售1日，每件盛惠480蚊；球迷之後仲可以去World Soccer球衣專門店加印號碼，而球迷會會員仲免費㖭。另外，買滿700蚊波飛可獲贈T恤，數量有限，送完即止。
贊助商力撐預售理想
到底今屆賀歲盃有幾多球迷入場，坊間都有唔同睇法；有話有齊唔同洲份球隊，戲碼唔錯，亦有話吸引力麻麻。聽聞兩個賽日加埋只係賣咗1萬張飛，而豪使成千萬嘅公民主席兼賽事贊助商張廣勇就唔肯透露預售情況，只係話同去年比，今次係可接受水平。
政府派飛「表錯情」?
今次賀歲盃係特區政府今年「祝福香港」嘅頭炮活動，有幾千張飛派畀各組織同基層，但有市民向本報爆料，話好多攞咗免費飛嘅基層，原來返咗國內過年，放飛機嘅機會好大喎。