馬年伊始，八方喺大年初一亦同各位讀者拜年，祝大家新一年龍馬精神。其實除咗特首梁振英，政界內都有唔少人屬馬，立法會就有三代共六位馬仔馬女，佢哋齊齊祝香港市民馬到功成，事事一馬當先。
何秀蘭懶理犯太歲
喺𠵱家呢個社會，60歲都仲係壯年啦，所以對54年出世嘅工黨何秀蘭、建制派陳健波同謝偉銓嚟講，年齡絕對唔係秘密；但對於本命年犯太歲之說，陳健波話既然生肖撞到正，會去拜太歲；謝偉銓就話一直遵從母親大人意見，過去幾年年尾都有去蓮花宮觀音廟拜太歲同還神，今年當然唔例外。反而何秀蘭一於少理，話百無禁忌，平常心看待。
年輕啲嘅除咗有66年出生、近排不斷為街坊寫揮春嘅新同盟范國威；仲有兩隻78年出世嘅馬仔，公民黨郭榮鏗同工聯會郭偉強。
今年36歲嘅佢哋唔怕犯太歲；信基督教嘅郭榮鏗話「我信主就得啦」，新年願望係政改搞得掂，盡快有真普選。郭偉強亦話事在人為嘅啫，但都會做孝順仔，將阿媽畀佢攝太歲嘅物品放喺袋，希望乜嘢生肖都好，馬年齊齊行大運。八方都會休息幾日，初五再同大家見面。
mailto:[email protected]