史杜列治真係好有英超本土球星嘅風采，究竟係乜？咪係高調囉！呢位英格蘭前鋒喺禮拜二默西賽德打吡幫利物浦大炒愛華頓4:0後，隨即喺禮拜三揸佢架價值兩球幾港紙嘅法拉利出嚟晒命。揸靚車冇問題，但我求大俠提醒佢一句，千祈咪學佢紅軍隊友韋斯頓咁低能，搞到俾人笑成世。
打吡入兩球好風騷
若然可以去英超踢波，真係好過中六合彩，事關份糧真係高到你唔信；24歲嘅利物浦前鋒史杜列治喺英超雖然未係一線，但據報喺紅軍嘅周薪有成6萬鎊。佢搵咁多，梗係乜玩具都買到啦，又點會冇英超球星身份象徵嘅法拉利呀！禮拜二佢喺打吡戰轟入兩粒，協助利物浦主場狂數愛華頓4:0。有好表現心情自然靚，喺禮拜三佢嗱嗱臨揸架價值20萬鎊嘅法拉利458出嚟威。
史杜列治日光日白揸部法拉利喺街頭招搖過市，梗係吸引到途人目光啦。但我求大俠奉勸佢一句，利物浦市唔係得紅軍一支球隊，仲有愛華頓，炒完人就揸架法拉利晒命，小心惹麻煩呀。
波子衝泥氹最醜怪
話時話，我求大俠提醒史杜列治咪好似佢嘅利物浦隊友韋斯頓咁低能。事緣現年20歲、今季俾紅軍借咗去英冠打比郡嘅韋斯頓，早前揸佢部價值10萬鎊嘅灰色「波子」，點知誤信GPS系統迷路入咗樹林，仲駛入咗個泥氹度（小圖），搞到要棄車報警求助。你知啦，話晒史杜列治同蘇亞雷斯係紅軍SAS，如果揸住架名車搞出事，肯定會俾啲小報鋪天蓋地咁報道，仲會俾球迷笑足一世。