日本班球星向來姿整，掹眉留鬚之外仲好注重個髮型，但浮誇到好似本田圭佑咁樣，真係萬中無一。呢位AC米蘭球員每年花喺剪頭髮嘅錢，據聞就要成150萬港紙咁多，夠你喺天水圍買一間村屋。
3周飛一次包機票食宿
27歲嘅本田圭佑今個月由莫斯科中央陸軍免費轉投AC米蘭，年薪達7.7億日圓，即係5,850萬港紙；但佢隨即俾意大利傳媒笑係花瓶，事關佢真係好姿整。日本傳媒日前爆料，本田6年前仲喺日聯效力名古屋鯨魚嘅時候，就開始去代官山搵一位叫林勳嘅髮型師幫佢剪頭髮。08年1月佢去咗荷蘭發展，踢咗芬洛兩年後，喺2010年1月轉投俄超嘅莫斯科中央陸軍；嗰時佢上緊位，所以亦越嚟越注重自己個髮型。
聽講本田喺俄羅斯踢波時，林勳每3個禮拜就由日本飛去莫斯科一次，幫佢做頭髮護理。林勳嘅收費唔算貴，每次大約係12,600日圓，可能同你喺中環剪個頭相差無幾，但佢嘅食住同機票係本田全包，所以加加埋埋都好襟計。
本田今個月由俄超轉戰意甲，繼續搵林勳做御用髮型師，林勳就喺今個月25至31號出差去咗幫本田剪頭髮。日本啲八卦雜誌仲幫佢計過，如果林勳keep住每3個禮拜去米蘭一次，一年張單就要接近2,000萬日圓，即大約150萬港紙。林勳就話：「我係透過朋友介紹認識本田，之後就開始幫佢剪頭髮。」
壽仔香川都搵林勳San
林勳查實都幾猛料，之前係名宿中田英壽嘅御用髮型師，而佢出差剪髮就由315,000日圓起（1年15次）。佢仲話：「我仲有幫香川真司剪頭髮，但久唔久先幫佢剪一次；之前我都有幫中田英壽剪，而且每3個禮拜就會去意大利一次。」
對於外界成日攞本田嚟同壽仔比較，林勳就好識做咁話：「大家都好留意本田同壽仔嘅髮型，但我認為每個球員都有自己嘅風格，所以冇可能比較到。」話時話，林勳家陣喺代官山一間叫Ambesten嘅髮型屋度做，如果你都想好似本田咁型，有機會飛日本時可以去幫襯吓㗎。