入行五年，惹火G.E.M.在是非叢中茁壯成長，身經百戰後的今日要面對因《我是歌手2》竄紅後的是是非非，她處之泰然，說：「我一路喺香港有好多training，我已經學識咗點樣去處理，以前我第一次遇到呢啲嘢嘅時候，係急唔切一定要去解釋，第一次係話我鬧千嬅，話我話千嬅唱歌走音呀！我係驚到爆，我心諗，黐線㗎！我不知幾鍾意楊千嬅，跟住我係要走去同千嬅講我冇呀！我喺網上面打咗一篇勁長嘅嘢去澄清，後尾千嬅都冇嘢，仲有甄妮姐姐、商台、又有梁振英單嘢。」
G.E.M.續說：「我經歷好多單嘢，一路慢慢學習，最近啲人話我《我是歌手2》嗌停重唱唔公平，如果我唔嗌停先係唔公平，呢啲俾人無理咁去講同攻擊，我已經學識咗，一句嘢都唔使同自己辯護，你急住去澄清，你會挑起更加多罵戰，同埋會影響自己心情，做唔到你應該要做嘅嘢，你可能嗰啲時間應該花喺下一個表演上面，你攞嚟擔心一啲控制唔到嘅嘢，可能越描越黑，同越辯越明，你冇辦法預計，但係其實嗰樣嘢唔係你𠵱家要focus嘅嘢。」以上的一番話，出自一個90後的口，G.E.M真估你不到！