海迪早前回內地工作，和當地公司管理層講開反貪腐問題。佢話最近去北京一間高檔餐廳食飯，呢間餐廳海迪兩年前都幫襯過，當時只覺極度浮誇，搞咩結合詩集歌賦於一身的「意境菜」，價格自然貴到離譜。該管理層形容，呢間嘢最近已經「痛改前非」，好正經咁推出家常小菜，就連最普通的包子、饅頭都有。呢一輪提倡節儉、減少公費的運動，影響無遠弗屆，就連臨近農曆新年，有國企想話印賀年卡和日曆畀客戶都被禁止。
上星期，內地連鎖酒店開元集團嘅老闆陳妙林，在接受媒體採訪時就「爆響口」，話旗下多家五星酒店已經決定轉型，甚至知道行內有五星酒店主動要求「降星」。去年上半年內地約700間五星酒店，平均入住率只有50%。呢個水平相信連維皮都唔夠。
咁今年奢侈品銷情及高檔消費，見咗底未呢？有相關企業的管理層就認為，內地奢侈品銷情應該算係平穩咗，但要有復蘇？就仲未見到。他相信那些一線大品牌，未來幾年都會大幅減少、甚至暫停開舖，希望趁機做多啲鞏固品牌嘅工作，翻新或擴大分店，休養生息。樂香園今日收爐，到年初五（下周二）啟市。踏入馬年前夕，密西比和海迪在此先恭祝各位新年進步，馬到功成！
海迪