【《蘋果》專訪】香港出道時叫小巨肺，內地爆紅後號稱小魔女，她是我們的G.E.M.鄧紫棋。
湖南衛視以巨額酬金做招徠，餌誘中港台具號召力的歌手在《我是歌手2》中同場較勁。來自香港又在內地寂寂無聞的歌手鄧紫棋，第一集出場，觀眾嗤之以鼻，韓磊第一句問：「她是誰呀？」第二集爆肺唱功演繹汪峰成名作《存在》，嶄露頭角，第三集獻唱《你把我灌醉》成功把聽眾聚焦，首度榮登榜首，第四集鋼琴獨奏唱出G.E.M.style的《我要我們在一起》，技驚四座，結果內地Miss Chan Chan韋唯老師和台灣最佳男歌手曹格被淘汰，同場力壓內地譚校長韓磊和台灣唱家班張宇師傅，小魔女一炮而紅。
面對重量級歌手，G.E.M.無畏無懼，一直以來，全賴心中的金句「忘記背後，努力面前，向着標杆直跑」帶領她勇往直前，享受着每一次的表演舞台。
撰文：楊潔雯
阿Q精神的G.E.M.笑對每一集《我是歌手2》的競賽，前日她接受訪問時說：「佢哋係唔知我係邊個，除咗曹格！韓磊直頭喺電視度話：『她是誰呀？』我去之前做好準備大家唔識我㗎喇！即係輸咗都唔𤓓囉！你最細個，最冇經驗又係你，然後大家又唔知你係邊個，輸咗都唔緊要喇！」G.E.M.本着單純的阿Q精神勇往直前，目標可是《我是歌手2》的冠軍？她說：「嗰啲諗唔到呀！你諗就會想像一個無謂壓力先喇！另一樣嘢，你上台係諗緊點樣攞冠軍，嗰樣嘢已經唔純正，嗰個理由係唔啱囉！個理由係抄apple嘅，佢哋講嘅嘢係每一樣嘢係要有啱嘅原因先去做。」
着重團隊精神
適當的壓力是推動力，過份緊張，會變成一個包袱，估不到年紀輕輕的G.E.M.，迅速走出壓力迷宮，她說：「因為我單純，音樂係我唯一好有effort同passion嘅嘢，當我捉番住我點解鍾意做歌手？點解會唱歌？點解會寫歌？個原因同初衷的時候，就開始唔驚，所以由第一集到𠵱家個心理狀況都係比較平穩。我唔會因為介意排名，亦冇呢個競爭嘅心。」成敗得失對G.E.M.不是最重要，她着緊的是每一個演出機會，她說：「我最緊張係自己個表現，如果我表現得好好，就算我攞唔到好好名次，我都已經對得起自己囉！咁所以每一次我比較緊張係我表演係可以平穩地正常發揮，定係我有乜甩漏呢？呢個先係我緊張嘅嘢囉！so far我覺得自己表現都係好正常，冇乜錯漏！」
成績名列前茅，G.E.M.亦不敢居功至偉，她說：「我覺得我嘅團隊同我合作得好好，如果所有嘢靠我一個人做，一定會有驚嘅時候，我感覺我團隊畀好大support我，每一次我搵歌會畀好多意見我！搵完歌編曲，所有嘢會一齊做，每一個方面都係一齊做嘅話，作戰過程當中你唔會覺得孤單，無論係成與敗大家都係一齊嘅result，所以攞到好名次嘅時候，我又唔會太過驕傲，因為係大家一齊做出來，如果攞唔到好名次的時候，又唔會覺得太傷心，就係一條船上面有好多人，一齊去承擔。」
「香港是我根」
G.E.M.不計成敗得失，只求突破，有說她只會嗌破喉嚨博掌聲，但將會在2月7日播映的《我是歌手2》，G.E.M.揀選了Beyond《喜歡你》參賽，她說：「我覺得編排其實係好重要，如果你去親都剩係唱高音，好快會審美疲勞，啲人會厭，同埋唔係每一首歌都啱咁做，好似《喜歡你》，你又冇得嗌，你又唔嗌得，一嗌就摧毀佢，咁所以都要因應嗰首係乜歌囉！你想營造嘅情緒係啲乜嘢。」
表面上是一個綜藝節目，實際上G.E.M.是代表香港的歌手跟內地、台灣歌手較勁，今日吐氣揚眉，她感觸地說：「我喺香港不嬲有fans同埋銷量，成績都唔錯，所以其實香港fans都畀好多support，咁我都要多謝佢哋，如果唔係佢哋一開始喺香港咁樣支持我，我今日去唔到其他地方，所以我覺得好似一棵樹咁，如果你要成長得好茂盛嘅話，你個根一定要好紮實，咁香港就我係嘅根囉！」