鄺美雲（Cally）不但是愛犬之人，身為馬主的她，對名下的馬匹亦十分有情，日前帶同兩隻愛犬Cash和Euro，在練馬師鄭俊偉陪同下，親到沙田馬房，初會她去年以百多萬元新買的馬匹「甜蜜鑽石」，狗馬相逢，一樣可營造和諧氣氛，合演一個狗馬亨通，和氣生財的團圓場面。
早年曾買過「祿寶」、「甜蜜福星」的Cally，因馬匹已全部退役，Cally去年再斥資百多萬在新西蘭買入三歲馬匹，改名「甜蜜鑽石」。日前Cally帶了Cash和Euro往探望愛駒，其間Euro與甜蜜鑽石遠遠見面時即發聲狂吠，反而Cash氣定神閒，在馬房內與甜蜜鑽石近距離接觸全程相安無事，更樂意親嘴，Cash與甜蜜鑽石合演一場狗馬亨通，令Cally開心不已。
娶孫新抱
當日Cally甫入馬房即見識甜蜜鑽石屙馬尿，大呼好意頭，Cally說：「買佢因為合眼緣，我睇片見佢個樣好純，好似幾聽話咁，又鍾意呢隻棗色，就喺幾隻馬中揀咗佢，希望佢將來有啲成績，亦希望大家買多啲鑽石，甜甜蜜蜜啦！」
跟地產商高層林達民拍拖年多，問到新年可有結婚好消息公佈，Cally笑說：「都有好消息呀！Euro４、5月會成親娶老婆，Cash要做老爺，我就做太嫲喇！」談到馬年願望，Cally說：「希望大家都健康、平安、發財，樣樣如意吉祥啦！」而接下來的假日，Cally已放棄到歐洲旅行，留在港休息，年初一與男友及朋友同慶祝，初二則到男友家拜年，初三過二人世界，一連幾日都過得甜甜蜜蜜。
採訪：羅美倫
