中電（002）副主席阮蘇少湄噚日獲理工大學頒授大學院士榮銜，喺台上有感而發，指做女強人唔易。佢憶述2002年被委任為中電常務董事時，引來唔少人質疑會計師出身嘅佢，點能夠領導呢間大企業，有人甚至嘗試追溯佢家族同人脈關係，但都搵唔到答案。
佢話，當年有人將佢歸類為作風男性化、盛氣凌人嘅老闆，接觸後先知佢好斯文。
佢為事業女性抱不平，指時至今日，職業女性仍經常被視作難相處嘅人，唔係非常情緒化，就係橫行霸道；或者係冇男人想娶嘅剩女、差勁嘅太太、疏忽嘅母親，種種成見，令唔少女性問自己，咁辛苦付出係咪值得？
佢希望為同事樹立榜樣，證明事業有成嘅女性，對社會有貢獻，同時亦可擁有美滿嘅家庭生活。女性擅長與人溝通，有助拉近人與人之間距離，佢認為呢點十分重要。