蛇年將盡，唐牛在此先預祝各位戰友馬年得心應手，一馬當先！歲晚大掃除，搵番唔少舊剪報，隨手翻開，發現題為「中資股蓄勢/即將/密謀反彈」嘅文章，近年每隔一段時間就出現，某程度上其實100%講中，事關中資股的確係有反彈，只不過係冇升幅，可憐長情散戶痴心錯付，奉上一殼眼淚。
金融海嘯後，除咗低息環境外，炒股唔炒市成為另一個新常態。恒指近幾年大部份時間喺18000至24000點上落，波幅只得6,000點，幅度計只有三成，一隻當炒股，三兩日隨時都有一倍升幅，無怪乎細價股已經取代咗輪證位置，成為短炒資金嘅追捧對象。
噚日推介嘅味千（538），收市後一如預期發盈喜，9元水平失而復得，支持力甚強，希望有趁低撈嘅戰友，今日可以埋個靚齋。
今日大除夕半日市，唐牛已處於收爐mode，如果戰友諗住玩埋半日，可以向兩隻破頂股埋手──先有半新股老恒和（2226），前日掛牌示人以弱，全日最高價竟不及暗盤收市價，原來係有心人密謀收貨，噚日炒高15%兼dayhigh收，相信散戶已沽得七七八八，冇蟹貨下可以繼續任舞。另一隻係同屬破頂一族嘅藥股四環（460），經過上周震倉後，呢幾日三扒兩撥又創收市新高，又係高處未算高格局。
唐牛