年尾流流，好多人諗住平平安安等收爐，點知新興市場突然「爆鑊」，阿根廷上周四失驚無神扯白旗，話唔再托市，拖累披索一夜間重挫15%，土耳其里拉、巴西雷阿爾等拉美貨幣亦跌鑊甘，連一直強勢嘅美股，上個禮拜五亦大插三百幾點，殺個措手不及，搞到市場人心惶惶，擔心大跌市將至。
好似筆者老死「度縮F」咁，平時係穩陣派，為人節儉，有多餘放喺銀行，平時鐘意唱K紓發情感。由於佢早輪成日聽到啲同事話炒股easy執，耳濡目染下終於按捺不住，跟風學人買當炒三四線股仔，早排市旺旗開得勝，自然笑逐顏開，個人亦變得輕浮，歌神首「財神到」及「啲錢會繼續嚟」，已成為佢唱K嘅飲歌。
加息唔治本 新興幣未脫險
贏得易，佢開始越買越大，點知啲三四線上個禮拜開始走樣，加上新興市場翻波拖累美股上周五急挫，禮拜六同佢唱K時垂頭喪氣，話好驚比阿根廷累死，有感而發，點了《貝隆夫人》首主題曲，高唱Don't 「dive」 for me，Argentina！
為免危機越演越烈，土耳其央行禮拜一宣佈召開緊急會議，市場憧憬會出重招穩定市場，加上印度央行周二爆冷再加息，令新興國貨幣回穩，土耳其央行結果重手加息4.25厘，至12厘去阻止資金外流，幅度比市場預期嘅兩厘高出一倍，凸顯該國救市嘅決心，土耳其里拉昨日反彈逾4%，但執筆時升幅大幅收窄，南非蘭特、巴西雷阿爾、墨西哥披索全部倒跌，反映聯儲局退市陰霾下，市場認為加息治標唔治本，新興市場冇咁易甩難。
事實上，上述國家面對嘅最大問題，喺當地嘅經常賬赤字高企，加上匯豐中國PMI出乎意料跌落50樓下，係半年來首次，由於中國係呢啲新興國出口嘅大買家，投資者擔心就算區內貨幣貶值，亦唔會幫到出口好多，而貶值亦會促使更多資金流走，惡性循環下，匯價應該有排跌，但對美國等發達市場有幾大影響，市場看法就有分歧。
事實上，市場部份意見認為，美股近期急挫，最大原因係過去年多大升下，從未出現像樣嘅調整，今次是借勢調整，姑勿論對或錯，由於投資者開始有戒心，估計美股短期易跌難升。
主流貨幣方面，見報時聯儲局已公佈議息結果，九成受訪經濟師都估儲局每月再減少買債100億美元，美元後向視乎會後聲明，若一如市場所料縮減買債，對美元應該有利，若果儲局爆冷不加碼收水，或者有更多理事提反對，美元可能受壓。個別貨幣焦點落在紐元，據該國央行今早議息，如再作出加息提示，紐元兌澳元可續創新高。弱勢「瀉」群之首加元創四年新低，美元高見1.1187加元，直撲1.12加元。另外，美元兌日圓周一曾跌到101.77嘅七周低位，噚日在103邊上落，短期續由避險需求主導。
奇兵
編按：俞亮外遊，奇兵暫代一天