菲菲有個model朋友，佢post上網嘅自拍相，相中人喺真實世界永遠搵唔到。唔好以為撞鬼，實際上佢會同你講：我用國產「整容」神App「美圖秀秀」！
有謂一白遮百醜，美圖秀秀當然有提供磨皮、美白效果；更勁嘅係，當中嘅瘦面、瘦身功能，令你1秒即變V煞面，拜拜肉？No way。咁強嘅App自然多人用，截至去年底，已有3億用戶，即係追平微信。美圖秀秀用戶群咁大，除咗百度廣告分成外，個App不時會同其他品牌合作，估計收入唔錯。
不過公司就更醒，眼見透過個App share去微博、QQ空間嘅相入面有50%都係自拍，上年學casio先後推出兩部「自拍神器」美顏手機，又真係成功吸引唔少妹妹買，以第一代MeituKiss為例，首批18,888部於53分鐘內即售罄。
美圖秀秀一方面證明，「自拍」都可以係一條財路；同時亦顯示，唔係得港女先自拍，根本全世界唔少男女都係「自拍精」，否則自拍照嘅英文「selfie」，都唔會勁到被列入牛津詞典。
查實自拍，以至自戀都唔係問題，但最好唔好upload自拍時，係要打句類似「Be happy」、「It's fine to be alone」呢類懶感懷身世嘅慨嘆，否則最終只會逼人設定「隱藏」你嘅靚相，最終得不償失。
Fifi
本欄逢周二、四刊出