司馬燕前年底患上胃癌，需要做手術將整個胃切除，過了一年多無「胃」人生，身體逐漸康復，司馬燕前日中午偕老公吳忠義撇甩兩個兒子去拍拖，先後到赤柱舂坎角璧如花園和大潭紅山半島睇樓。
睇勻屋裏露台
據知司馬燕一家自前年由北京回流香港，在現居居住沒多久就大病，現在病好趁有精神，便計劃馬年搬屋轉運。過去半個月司馬燕與老公孖咇睇樓接近40間，前日他們又情侶裝變身「黑超夫婦」出動去睇樓，並先去睇璧如花園一個接近3,000呎獨立屋。司馬燕在屋裏四邊望，又出去露台睇環境。之後再跟地產女經紀到紅山半島，他們在屋內逗留最少半個鐘，看來揀啱心頭好。
「紅山半島好啱」
司馬燕夫婦睇完樓，就與地產女經紀到赤柱嘆下午茶，三人全程雞啄唔斷。記者前晚致電司馬燕，問她是否已準備馬年買豪宅？她說：「唔買住，租住先，𠵱家個巿仲好貴又動盪。萬一買咗好似97年或沙士咁係咁跌，我咪蝕老本。我打算睇多半年先入巿，我舊居住得唔係咁好，風水師話唔啱我，租約咁啱期滿，我同老公打算過咗年就搬，今日睇嘅幾間，紅山半島好啱我心水。」
此外，司馬燕日前接受鍾慧冰訪問時，大爆兒子吳澋滔從未停過拍拖，又笑指恨抱孫，她說：「因為病咗，唔知自己仲有幾多時間。」
採訪、攝影：楊浩賢、陳辰
