馬雲派紅包，馬化騰就幫大家隔空派利是。騰訊（700）上周六起推出「微信紅包」，用戶透過微信支付平台「財付通」就可以派利是，小朋友連「拜年口才工作坊」嘅學費都慳番。可惜，香港嘅微信用戶暫時未有得玩，皆因微信支付戶口要用內地身份證、銀行卡先登記到。
關注咗「微信紅包」嘅用戶只需輸入指定金額、派發利是總數，透過財付通就可以派利是。除咗派利是，微信仲搞埋「搶利是」，用戶可以將利是發送去微信群組，等班朋友搶餐飽。但搶到嘅金額係由系統隨機編配，唔好彩搶得一仙都未定。
港人冇得玩，內地人就玩得不亦樂乎，傳聞呢項活動吸引到好多用戶登記財付通，數字隔夜由2,000萬增至1億戶，不過騰訊發言人就澄清話：「這個傳聞太誇張。」