過年後就要準備在三月底退休嘅財務R在辦公室已經冇乜重要事情好做，差不多已將全部工作移交接任人，但在公司返工三十五年，總有不少舊文件舊書要報廢，自己收收埋埋嘅私人file幾個，要整理後拎番屋企。佢呢日在file中搵到兩份人壽保險單，原來係在1984年、1985年時候買下嘅，當時仔細老婆嫩，買咗兩份壽險，四十萬美元一份，每月供款近五千元，當時都供得吃力㗎，不過之後一路升級加薪，久而久之，佢幾乎已經唔記得每月有自動轉賬付保險費㖭。
財務R飲茶時對左丁山講：「當時還住在大埔村屋，諗住自己如有事，老婆可得保險金八十萬美元，已夠買七個沙田第一城嘅1018呎單位，老婆可安枕無憂啦。點知眨吓眼過咗30年，八十萬美元還不夠在第一城買兩間395，如果我唔係有退休金，已買樓，老婆繼承份保險金都唔捱得好多年！」
此乃通脹、樓脹之結果，吃定息之人注定悲慘，超低利率之禍患也。外匯C聽見，叫財務R立即斷保向保險公司取回現金值（cash value），費事再供死會，拎番啲錢去炒股好過！退休人士去炒股，風險甚大，不過外匯C講到眉飛色舞，話兩個星期內賺咗110萬，呢餐係佢嘅，任食，聽者無不動容，問佢點樣做到股神上身。外匯C話：「我揸咗七年內銀股收息，但除股息外，四大內銀股七年內股價表現曳，賺唔多錢。早前我見到一隻新股『博雅互動』上市，見佢超額認購800倍，一上市就由底價5.4元升到六個幾，又回落至五個六，我心諗超額800倍，冇理由跌破底價嘅啫，於是入市買咗二十幾萬股，想唔到呢排IT概念當炒，隻股升到飛起，最高見過13蚊，我分批賣出，埋單計數，兩星期內賺咗百一萬。」果真厲害，唔怪得話炒股唔炒市。財務R第二日就走去港威大厦永明金融大厦退保，佢話保險公司服務超一流，理財顧問陳小姐代佢填表，佢簽個名就搞掂，輕鬆到極，覺得佢地認真以客為本。佢又向另一間保險公司打電話查詢，對方寄來一份summary（撮要）俾佢參考，一睇就覺得退保係啱嘅，因為呢間保險公司嘅銀行自動轉賬紀錄竟然還是印上：Bank of America Asia Ltd，out到離晒譜啦，事關呢間銀行老早已經由建設銀行收購咗，改晒名嘞。