香港地好多女強人喺職場表現出眾，但返到屋企係「冇飯煮婦」，打掃有傭人分擔，分分鐘連燈膽都未換過，中電（002）企業發展總裁莊偉茵（Quince）就係其中一位未換過燈膽嘅女強人。
今年係中電義工隊成立20周年，義工隊計劃今年會去各區幫獨居長者換慳電膽，目標係希望幫到3,000戶，按每戶兩個燈膽計算，總共涉及6,000個燈膽，預計每個星期六都會有換燈膽活動。
Quince身兼義工隊顧問，上周六就首次參與呢個換燈膽活動，去到馬鞍山恒安邨探訪兩戶獨居長者。佢嘅屋企一切都由佢老公打點，換燈膽真係點都未輪到佢做，於是佢要即場跟同事學點樣換，好在佢冇雞手鴨腳，亦冇打爛嘢。上市公司女高層學換燈膽，聽落匪夷所思，但香港講男女平等，亦唔係好出奇！