短線跌浪裏面博反彈，永遠似賭大細，要咁樣贏短線錢，一係講把握，一係考反應。由星期一低位到而家，唔少當炒股已經反彈一成，甚至更多，買熱門股好明顯已經過咗考反應嘅時候，要再博就要講究對個股把握。
講一個例子，就係華南城（1668），之前佢上衝到4.99元高位，就見短期頂部，前日曾經跌破3.5元嘅CB價，由於距離高位跌咗有三成，加上係見頂後第一次衝擊3.5元關鍵位，所以點都有好友出嚟頂，股價隨即反彈，噚日升到去3.94元，以3.5元短線買入，唔夠兩日可以有成12%回報。
中升跌穿怡和配股價
講開又講，唔計耀才（1428），最近被大企業入股嘅仲有中升（881），最近發咗2.38億股畀怡和，每股作價大約10.8元；另外仲發30.91億元嘅換股債，行使價12.96元，配股後同CB行使後，怡和可佔兩成股權。
消息見光之後首個交易日，中升以13.8元高開，但去到噚日股價曾經跌到去10.72元，連配股價都穿埋，究竟單deal同華南城嗰個有乜分別？中升有乜嘢出錯？
作為投資者，唔可能唔知內地做生意要靠關係，假設你有個死對頭競爭對手，佢純粹係中國人持控股權，至於你就啱啱引入一間外國大企業主要股東，你喺阿爺面前，外國人主要股東，未打招呼都好可能已經變負分，阿爺好難唔信自己人，去信外國人。
所以，以後可能有乜好嘢都唔益你先，到時即使你吸收咗外國嘅管理經驗、貨源供應，都可能無用武之地。之所以中升噚日股價即市只能勉強守住10.8元，唔代表未來好有前景。你睇以前係外資嘅盛高置地，賣盤畀綠地後，股價可以一個月升兩倍，就知外國人持股同中國人持股嘅分別。
至於另一隻維達（3331）又如何？之前俾Tempo全購，情況亦差不多，比中升好少少，係Tempo之前用11元進行全購，相信11元想沽貨嘅人都一早沽咗，形成呢個位支持力堅係大，就當你前收市價11.6元買入，輸到盡都係明顯跌破11元止蝕，輸極有限，博番一成回報未必唔得，長線睇嚟未必係好選擇。
呢個故事話埋畀我哋聽，以後遇上外資將中國公司股權轉手畀番中資，千祈唔好錯失機會。
講番大市中線睇法，晉佳依然偏淡，近期有好多人將跌市歸咎喺地方債、錢荒、信託爆煲危機度，然後剖析點樣唔大劑法，就認為唔使太驚。
中資股仲有排跌
如果講呢啲就當係中資股死因，小弟略嫌唔夠「坦白」，去到而家，事實上整個市場仲係為中資股死因估估吓，晉佳就認為，去到有一日真相大白，中資股先有機會見底，結論係，中資股有排跌。
晉佳
本欄逢周三刊登