社民連成員曾健成（阿牛）三年前同一班美孚新邨居民瞓街示威，阻止承建商入地盤起屏風樓，結果發展商祥達取得禁制令。阿牛噚日再就呢單case去終審法院申請上訴許可，話禁制令限制佢言論同集會自由，可惜都係俾終院駁回申請。
佢喺庭外語帶無奈咁講，因為單案欠落估計超過400萬訟費，「可能會面臨破產」，要賣咗持有嘅半個物業，連累埋屋企人。但佢話冇後悔，仲狠批發展商成功申請將曾經闖入地盤嘅人列做被告，個定義太闊，會助長地產霸權，「咁第日李嘉誠都可以唔准其他人經過長江中心啦」。佢話當日覺得唔公義，先同長毛同毛孟靜請纓加入被告行列，點知法官認為佢可以唔請纓，咁講即係代表「以後遇到唔公義，唔好出聲，出聲就等於自找麻煩」，覺得好唔合理喎。