「年廿八，洗邋遢」，噚日新民主同盟就應吓節，搞咗個「掃走庸官香港發」行動，嚴選馬年前必須送走嘅三大庸官，佢哋就係囤地波、吳得掂同埋蘇卡片嘞。高登男神范國威話，過去一年，狼英同呢三位庸官，喺施政上失誤連連，民望長期喺低位徘徊，但竟然仲厚顏拒絕下台，所以要代表市民將呢三件垃圾掃走，令香港踏入馬年，施政可以撥亂反正。佢哋仲將示威標語當揮春，寫上「狼心狗肺，全港最廢，施政靠害，馬上下台；囤地波波，是非多多，發展東北，民望盡失；跨境學童，政策亂龍，教育局長，唔做得長；商務錦樑，亂點客量，擴自由行，最乞人憎」。話狼英同佢地共四人，應馬上引咎下台，香港先會有運行。