股評人胡孟青（青姐）自從2011年冇做有線財經清談節目後，唔少粉絲都掛住佢，本報財經組最近就請到佢同孫柏文，再組同類節目「Cash Canteen」，節目今日開始放喺蘋果即時新聞同埋動新聞剪輯播放，首個題目係講理財產品。
新節目主要講財經熱話，唔係畀冧巴，亦都未必次次講股票，例如下月財爺公佈財政預算案，佢哋就可能會討論裏面嘅內容，仲可能邀請嘉賓一齊傾。
青姐對於「復出」不以為然，話「講自己講嘅嘢，都係做嘢」，以前從來都係咁，佢亦唔係好恨做電視，睇性質接工作。反而肥仔變瘦仔嘅孫柏文就話好興奮，因為可以再次喺鏡頭前面同青姐合作，佢知道青姐反應平淡，就話「好似（足球小將）戴志偉同麥泰萊合作咁，興奮嘅一定係麥泰萊！」