送蛇迎馬，唐英年前晚就約埋競選辦職員，去老友林建岳喺中環置地廣場新開嘅餐廳China Tang團年，據聞席間佢四圍隊酒，飲到包括石禮謙在內嘅老友貓步離場。唐唐會留港度歲，今個新年唔係驛馬星動。大把金句嘅佢，今年別出心裁以「馬」論香港，形容香港政制發展似馬術障礙賽，希望最終人馬合一、越過難關；經濟方面則似賽馬，不斷要同內地及海外競爭，祝願香港步步領先。至於社會發展，唐唐覺得應該好似馬術盛裝舞步賽咁和諧優美又流暢，似乎唔想咁多紛爭衝突。而佢最想嘅係社會繼續「馬照跑」，工程要「上馬」、計劃要「去馬」、公司要有「千里馬」、打工嘅唔好「做牛做馬」，人人「馬力十足」自然「馬到功成」。