上周，患了議員流會遲到專用疾病：上呼吸道感染。
星期六晚上，街坊診所關門大吉，唯有幫襯新界西某私家醫院。「喉嚨紅腫發炎有啲痛，頭赤赤。」
「有無咳？」「無。」
「有無鼻水？」「無。」
「聽吓個肺……唔，都幾清。」醫生你讚我個肺好聽？
「無乜嘢，上呼吸道感染。」
效率快，無人排，去藥房執藥，先望價錢……駛唔駛咁貴，五百到尾！食個自助餐都得啦……算，唔駛排隊係要付出代價。但望吓啲藥，真係火都嚟。
「呢個係必理痛，退燒用。」
明白，即係街邊屈人寺都有得賣嗰啲。
「呢個係喉糖，消炎用㗎。呢個係咳藥水。」
喉糖……唔該晒喎。
「呢個係收鼻水藥，朝早一隻，夜晚又有另一隻。」
無啦？咁多隻藥，得支咳藥水關我個喉嚨事，其他都係閒雜人等。
「姑娘，我都無鼻水，點解要開成兩隻收鼻水藥俾我呢？」
「可能……醫生驚你之後會有鼻水呢？」
以後？你唔好開定粒偉哥俾我？我喉嚨發炎先係問題喎。
「必理痛都係醫喉嚨痛㗎……」
姑娘……咪玩啦，你胃痛都唔會食必理痛啦。最後醫生收番兩隻收鼻水藥，減番百幾蚊藥費，但堅拒加開其他消炎藥。
翌日，光顧樂富街坊診所，得到：一支藥水加五大包消炎化痰藥丸。
難道我的病在私家醫院只值一支咳藥水？而去到街邊診所，卻要用數十粒藥丸？這不是藥丸多就覺得抵啲的問題，而是，求其與認真的分別。
病人和醫生資訊永遠不對等，如果不貨比三家，我就抱住支咳藥水咳天光，你也不會知道，原來其他醫生，會更用心對你，也不會出現「無鼻水但開鼻水藥」、「必理痛醫喉嚨痛」的荒謬。
醫不在貴，有心則名。