第一代星級地產分析員卓百德（Peter Churchouse）雖生於新西蘭，但在港生活30幾年，已相當入鄉隨俗，臨近農曆新年，佢寄出嘅賀年卡，除咗一句恭喜發財，仲祝大家happy investing（投資愉快），按五行教大家馬年嘅投資宜忌，似乎唔想讓里昂風水指數專美喎。
屬火股份馬年當旺
呢張賀年卡認真特別，一打開就有成版用英文寫嘅投資錦囊，卓百德按「金木水火土」五行分析馬年投資宜忌。佢話，今年連續第二年帶有火嘅特性，環球經濟最多都係整固，好有機會放緩。
股市方面，馬年應該呈先跌後升格局，上半年大跌，年尾反彈。同火相關嘅板塊會造好，例如電子、科技、電訊、電腦股，能源股亦唔錯；其次係屬木嘅行業，如造紙、紡織等。
所謂水火不容，卓百德叫大家咪掂同水有關嘅板塊，例如銀行、金融、航運同旅遊業都要避之則吉。
卓百德以前係著名地產分析員，2009年開始係Portwood Capital話事人，管理亞洲地產基金同證券投資，呢個投資錦囊點可以唔提地產呢？佢依然睇淡地產，預期繼續調整，建議買家咪咁輕率入市。
卓百德係叱咤一時嘅星級地產股分析員，當年喺摩根士丹利，同喺瑞銀嘅林奮強都非常出名，一份報告隨時就可以郁到地產股股價。其他行業唔敢講，佢講地產就點都有參考價值。
李華華
mailto:[email protected]