味千中國（538）近季營運數據夠晒靚仔，帶動股價成功由谷底反彈。雖然已累積一定升幅，但全年業績盈喜幾無懸念，勢成新一輪升浪嘅催化劑，值得關注。
先睇近季營運數據，截至去年底止第四季，中港同店銷售增長持續，其中內地更出現雙位數字升幅，明顯走出骨湯門陰霾，重新上路。
再睇中期業績，盈利喪升1.8倍至1.3億銀，相當於2012年度盈利嘅85%，翻身指數爆燈，公佈盈喜只是時間問題。事實上，就算比較2012年度下半年數據，盈利亦有逾兩成增長，復蘇說法有根有據。營業額中期微升4%至15.7億銀，由於租金及人工成本佔營業額比例，分別下降至15.3%及23.7%，令毛利率按年升逾一個百分點至66.9%，營運效率明顯提升，抵讚！
集團財務狀況亦不失禮，扣除長短債後，手頭淨現金達到16億銀，相當於市值接近兩成，加上派息政策穩定，絕對稱得上係攻守兼備。
睇圖表，味千升破圓底頸線阻力後稍作整固，噚日再炒高3.5%，收報9.07元，衝穿10日線之餘，成交亦明顯增加，短線動力增強，話唔定係好事近，可候9元樓下吸納，博有好消息後再闖高峯。
唐牛