農曆年長假和美國聯儲局議息前夕，瘋炒「即日鮮」希望過肥年，在創新低股份中，映入眼簾是一隻曾是基金散戶愛股普拉達（1913），近月頻遭大行削目標價，昨曾創近年半新低，因內地肅貪倡廉、同胞隔籬飯香，鍾意去外國同鬼佬搶，令大中華區銷售現疲態。對奢侈品牌來說，更大危機可能未呈現，就是奢侈品消費模式的轉變。
上文提到網購增長以穿梭機的速度推進，當眾人以為奢侈品可排除在外，奢華品網站Net-A-Porter早已打破呢個傳統，做過時裝雜誌編輯的創辦人Natalie Massenet，將購物網站雜誌化，呢招唔係用嚟吸客，目標是設計師，呢班藝術家最怕個網站充滿銅臭味，靚靚介面令佢哋對你taste有信心，先可爭取到其Exclusive系列，連Karl Lagerfeld都請得郁，生意自然來。
奢侈品網站殺出一條血路可喜可賀，靠食老本的品牌最傷，放在同一擂台上隻揪唔內傷都難。話分兩頭，互聯網弊病在於抄得更快，近年類似的購物網站越來越多，令該網站的吸金力降低，最新披露總收入按年增長18%，但仍然錄得虧損。Massenet得天獨厚的生意頭腦和銳利的時裝觸角唔係人人可學，但最值得學習是善價而沽，她在2010年將大部份股份賣畀Richemont，袋袋平安，真高手。
Samantha
本欄逢周一、三、五刊出